Hypertriglyseridemi – høy verdi av triglyserider i blodet

Diagnosen blir stilt ved å måle triglyseridene i ei vanleg blodprøve (hos fastlegen). Fordi nivået av triglyserider i blodet blir påverka av kosthaldet, må blodprøva takast fastande for å stille ein sikker diagnose. Ei fastande blodprøve vil seie at du ikkje skal ete eller drikke dei siste 10–12 timane før blodprøva (men du kan drikke vatn).

• Normalt triglyseridnivå i blodet er under 1,7 mmol/L når prøva er tatt fastande.
• Moderat forhøgde triglyseridnivå er 1,7–10 mmol/L, og kan gi auka risiko for hjarte- og karsjukdom.
• Betydeleg forhøgde triglyseridnivå er høgare enn 10 mmol/L, og gir auka risiko for betennelse i bukspyttkjertelen (pankreatitt).

Høge triglyserider aukar risikoen for hjarte- og karsjukdom. Livsstil og kva du et og drikk, har mykje å seie for triglyseridnivået i blodet. Derfor er kosthald og livsstil ein viktig del av behandlinga når triglyseridene er høge.

Medisinar

Ved moderat forhøgde triglyseridnivå, er det mogleg å redusere triglyseridverdien stort hos dei aller fleste ved målretta kosthalds- og livsstilsbehandling. Omega-3 tilskot (tran eller kapslar) blir gitt som ein del av kosthaldsbehandlinga. Nokon må i tillegg bruke medisinar.

Ved stort forhøgde triglyseridnivå blir triglyseridsenkende medikament brukt i tillegg til kost- og livsstilsbehandling. Omega-3 kan da givast i høge dosar (2–6 gram) som legemiddel (Omacor).

Statinar er kolesterolsenkande medisinar som også senkar triglyseridene, særleg ved høge nivå, og blir også brukt i behandlinga. I nokre tilfelle blir det også brukt fibrater, som lege må søke om å få på såkalla registreringsfritak.

Dersom annan sjukdom er hovudårsaka til høge triglyserider er behandlinga av denne viktig, for eksempel god blodsukkerregulering ved diabetes. Også når annan sjukdom er utløysande for hypertriglyseridemien kan det vere aktuelt å gi medikament som reduserer triglyseridene. Det er uansett viktig å følge kost- og livsstilsråda da dette alltid er den viktigaste behandlinga.

Kosthald

Kosthald og livsstil har mykje å seie for triglyseridnivået i blodet. Overvekt og eit høgt inntak av metta feitt, sukker og alkohol vil føre til eit høgare nivå av triglyserider. Eit hjartevennleg kosthald med umetta feitt, fiber, lite sukker, lite alkohol og lite metta feitt kan redusere triglyseridnivået i blodet og igjen redusere risikoen for hjarte- og karsjukdom og redusere risiko for bukspyttkjertelbetennelse (pankreatitt).

Kosthaldsråd ved høge triglyserider:

Vel magre meieriprodukt og magert kjøtt

Reduser inntaket av feitt, spesielt metta feitt. Metta feitt finst det mykje av i feite meieriprodukt og feitt kjøtt. Vel dei magre produkta, reint kjøtt og kylling utan skinn. Avgrens inntaket av meierismør, hard margarin, fløyte og rømme i matlaginga, kaker, kjeks, hurtigmat, ferdigmat og snacks.

Vel feit fisk, flytande margarin/olje og nøtter

Vel matvarer med umetta feitt i staden for matvarer med metta feitt. Umetta feitt er feitt frå plante- og fiskeriket. Oljer, mjuke/flytande plantemargarinar, nøtter, avokado og feit fisk er gode kjelder til umetta feitt. Omega-3 feittsyrer (fiskefeitt) reduserer høge triglyserider.

Spis rikeleg med fiberrike matvarer dagleg som grønsaker, frukt, ber, belgvekstar, grove kornprodukt og andre fullkornsprodukt.

• Varier med ulike typar frukt, ber og grønsaker – til saman 5 porsjonar eller ei mengde tilsvarande 5 nevar dagleg.
• Vel brød med 3–4 skraverte felt på brødskalaen avmerkte på brødposen, eller brød med > 6 gram fiber per 100 gram brød.
• Vel kornblandingar med > 10 gram fiber og < 10 gram sukker per 100 gram kornblanding.
• Vel fullkornsris og fullkornspasta.

Avgrens inntaket av sukker

Reduser inntaket av sukra brus, saft, nektar, jus, meieriprodukt med tilsett sukker, sjokolade, godteri, søtt pålegg, kaker, kjeks og søte dessertar.

Avgrens inntaket av alkohol

Alkohol aukar triglyseridene i blodet, og bør derfor avgrensast.

Få meir informasjonen og brosjyren «Kosthaldsråd ved høge blodlipid» på nettsidene til Nasjonal kompetanseteneste for familiær hyperkolesterolemi.

Vektreduksjon ved overvekt

Overvekt aukar triglyseridene i blodet, og risikoen for hjarte- og karsjukdom. Ved overvekt og fedme er det derfor anbefalt med vektreduksjon. Snakk med fastlegen din om dette.

Meir om vektreduksjon ved overvekt og fedme på helsenorge.no

Røykeslutt

Røyking aukar risikoen for å få hjarte- og karsjukdom. Det er derfor ekstra viktig at personar med forhøgde triglyserider som røyker, sluttar å røyke.

Hjelp til røykeslutt på helsenorge.no

Fysisk aktivitet

Fysisk aktivitet har mange gode effektar på helsa, også på triglyserider og for å førebygge hjarte- og karsjukdommar. Det blir anbefalt å vere fysisk aktiv 150–300 minutt i løpet av ei veke.

Om oppfordringar til fysisk aktivitet på helsenorge.no

Moderat hypertriglyseridemi blir vanlegvis følgt opp av fastlege. Triglyseridemi som er monaleg forhøgd, blir ofte følgd opp ved ein lipidpoliklinikk med ½ – 2 års mellomrom, avhengig av behandlingsstad. Mellom timane på lipidpoliklinikken bør du éin til to gonger i året bestille time hos fastlege for å kontrollere behandlinga og minst følgande verdiar:

• triglyserider (fastande)
• totalkolesterol
• LDL-kolesterol
• HDL-kolesterol
• ASAT
• ALAT
• CK
• kreatinin

Det er viktig at du snakkar med fastlegen om kosthald, fysisk aktivitet, røykeslutt og vektreduksjon ved overvekt.