Ufrivillig barnløshet - infertilitet

Utgreiingstimen kan vare inntil 60 minutt, og både mann og kvinne må møte. Opplysningar som kjem fram i tilvisingsbrev, blodprøve- og sædprøvesvar blir vurderte og diskuterte. Ultralyd av eggstokkar og hormonsvar bestemmer stimuleringsregimet som blir valt hos deg. Somme gonger blir også testiklane til mannen undersøkte med ultralyd.

Ved mistanke om at ikkje oppnådd graviditet kjem av tilstandar som krev operasjon blir de viste vidare til inngrep på sjukehuset. Ved manglande sædceller hos mannen blir han vist til testisbiopsi (TESA) for å sjå om det finst sædceller i testikkelen.

Utgreiinga resulterer ofte i direkte inntak til assistert befruktning. Legen bestemmer kva hormonstimulering og behandlingsform de skal ha.

I nokre tilfelle er ytterlegare utgreiing, operasjon eller livsstilsendring (til dømes korreksjon av vekt og røykjeslutt) nødvendig før assistert befruktning kan tilbydast.  

Når behandlinga er planlagd, ringjer du for å seie frå om menstruasjon. Du blir då sett opp til behandling ut frå menstruasjonsdato. Stimuleringa består av hormon som stimulerer eggstokkane til å modne fleire egg. Hormonsprøytene set du vanlegvis på deg sjølv. Du får opplæring til å setje sprøyter ved Fertilitetsseksjonen. Enkelte stimuleringsregime krev også bruk av nasespray for å regulere ned dine eigne hormon først.

Etter enda stimuleringstid kjem du på avtalt dato til ei ultralydundersøking. Legen vurderer om eggposane er «modne». Deretter set du ei eggløysingssprøyte 36 timar før egga blir henta ut.

Den aktuelle dagen møter de på Fertilitetsseksjonen, og mannen leverer sædprøve. Du får bedøving og egga blir henta ut ved hjelp av ultralyd og ei tynn nål. Lege, bioingeniør og sjukepleiar er involverte i denne prosessen.

Etter at laboratoriet har fått egga og sædcellene, skjer befruktninga med den metoden som er bestemd.

Eitt befrukta egg sett tilbake på dag 2, 3 eller 5 etter at egget er henta ut. Dersom det finst fleire befrukta egg med god kvalitet, blir dei frosne på dag 2 eller 5.

Du startar med eit progesteronpreparat som blir sett i skjeden same dag som egget er henta ut. Dette preparatet fungerer som ei hormonell støtte til livmorslimhinna i 14 dagar etter at det befrukta egget er sett inn.

I tida etter innsetjing av befrukta egg kan du leve heilt normalt, men unngå alkohol.

14 dagar etter innsetjing blir tek du ein graviditetstest. Resultatet av testen blir ringt inn til vakttelefonen vår, og vidare oppfølging blir avtalt med sjukepleiar.

Er du gravid, blir du vist til ein tidleg ultralyd i veke 7. Dette blir gjort anten på det lokale sjukehuset ditt, hos gynekolog eller på Fertilitetsseksjonen. Etter dette blir graviditeten følgd opp som eit normalt svangerskap hos fastlege/jordmor.

Er du ikkje gravid, men har fleire befrukta egg nedfrosne, blir du sett opp til eit fryseforsøk i ein seinare syklus.